默想耶穌：（台語詩）棕樹的慶典

[胡長松]

【棕樹的慶典】
.
二千年前有救主進入聖城
無人知影伊欲去佗位做王
彼時打狗塔加里揚的祖先閣佇這欉山棕樹跤走傱生湠
眾人毋知影怹嘛會行上永恆的道路
至大的創造者已經徛佇山崙的雲邊用日光咧看顧
共對南方群島行跤到的海風歕〔 pûn〕向怹的面
予遐勇健的查埔人佮查某人的頭毛佇風裡飄撇
嘛共海裡的螺仔佮掠袂了的魚蝦喊〔 hiàm〕入怹的魚籠
教怹用山岩的堅固做出器具
用茅仔的柔軟，做出厝頂、床佮怹美麗的後裔
閣用海湧的洗禮， 予遐和撒那的歡呼
對古早的橄欖山跤一直傳來到咱的故地
.
彼時有喝聲透到上懸的山尾溜
天頂的和平佮至高的榮耀攏歸騎驢的王
因為有一枝審判的筆已經夯佇伊將會血流血滴的手裡
遐用布衫佮樹枝舖路的百姓
佇受統治剝削的久年苦楚裡，呼喝自由佮敨放
怹目睭 nih-nih看伊，毋過看袂著路裡
所有人類的罪過佮哀傷的目屎攏咧聽候伊的受難
彼是伊的爸的決意嘛是伊的決意
聖殿予伊清洗，翠青的無花果
嘛因為無生果子受伊咒罵、蔫去
就親像虛偽的罪行佇伊的眼內攏愛消失
尚且伊嘛因為眾人的虛偽，予怹釘佇柴頭
.
春天的頭一遍月圓，彼是創世者所設的祭，
伊交代以色列取無缺點的羊仔來刣，
閣共羊仔血抹佇門框佮門楣〔 mn̂g-bâi〕。
因為創世者欲用羊仔的血來拯救
百姓，欲予伊當受氣對埃及出手的時，
看著羊血，就通對彼家盤過，親像無看怹的罪。
春天的頭一遍月圓，無人知影，經過遐濟年
當王的門徒用以利亞的杯互相期待彌賽亞駕臨的時
彌賽亞，已經坐佇怹的身邊，
彼个無缺點的王，家己欲成做受刣的羊，伊欲
予伊的血抹佇各各地的十字架
予伊所掛的十字架
　　成做創世者拯救的門
予見行入這片狹門的攏著得救，
閣為伊做伙慶祝三日後的復活！
.
佇塔加里揚的徛居地，山頂的尾蝶當咧走揣
春的滋味，刺桐樹的花蕊親像鮮血
開甲滿山紅豔，
到暗暝，草埔有幽芳，
只是烏雲徙步，
欲共白淨的月色遮崁。
有聲講：著趁有光的時行路，免得恁
予烏暗贏過。
毋過，佇海的彼頭，he是啥人坐帆船對湧裡來？
閣是啥人，會佮咱未來的囝孫相認？
天國的鎖匙早就夯佇時間之主的手裡，
彼枝鎖匙，是一滴三斤重的目屎
親像落塗的一粒麥仔。
.
兩千年前就設好的筵席，肥的精牲著欲刣矣
伊講恁著愛去大路口，
共所有拄著的人，攏請來食桌。
兩千年後，眾人攏來佇桌前，
有以色列的囝孫，
嘛有塔加里揚的囝孫。
怹無分大細，攏照伊所吩咐聚會。
來啊！時間之主已經共伊家己的身軀獻佇這場邀請
毋過時間本身，煞虛弱甲袂振袂動
──來啊！連鞭，筵席著欲開始
只是彼个主人當 leh承受
最尾後的憂悶。
.
伊的大粒汗細粒汗，割佇咱扒腹的心腸
伊肩胛頭的彼箍柴箍，嘛犁過
長長的石路──佇路的盡尾，將會是結束
嘛已經是開始。因為
兇勇的帝國拍袂贏哀傷的軍隊
白賊的刀，嘛刣袂過真理的草枝。
當毋甘的愛化做向望的新土，
種子落土湠新的氣脈，
一切艱苦的目屎，嘛渥出信心的秧仔。
你看，伊已經是最後一遍夯頭向天
伊的喙宣布講：成矣！
當天裂開的瞬間，雷公熾爁〔sih-nah〕
所有的賓客已經毋是賓客
怹成做新造的姊妹佮兄弟
佇地佮海的彼頭佮這頭。
.
2016/3/24 完稿佇受難週